باب الخروج
04 May 2013
أهم حاجة لازم تفتكرها وإنت بتقرأ الرواية ديه هي إنك لازم تكمل للأخر .. أوعي تستسلم .. أنا مش هأقدر أحرق لك القصة لأن الغلاف فيه النهاية والعنوان دليل الخلاصة والصفحة الأولي فيها كيف تنتهي الأمور
أهم حاجة هي إنك تكمل للأخر
ممكن تكره المؤلف عز الدين ف النص كده .. وممكن ما تطيقش شكري بعدها بشوية .. وقبل النهاية ممكن تصل إلي إنك تلعن آل فشير كلهم .. لكن ف النهاية لازم تعترف إنه عبقري
أهم حاجة إنك تكمل للأخر
الرواية هي عبارة عن دراسة منطقية للأوضاع السياسية بناء علي خبرة المؤلف كدبلوماسي ودكتور في العلوم السياسية .. الدراسة تتخيل ما يمكن أن يحدث وما يجب أن يحدث ولا يحدث في إطار درامي قد يدفع الأحداث إلي قمة درامية لكن بدون مبالغة لا يمكن تصديقها
إذا ما قرأت كتاب “في عين العاصفة” لنفس الكاتب وهو تجميع لمجموعة مقالات في مرحلة ما بعد الثورة تجد تشابه بين الأحداث الحقيقية والدرامية
بالتأكيد أنت لا تحتاج لقراءة هذا الكتاب لأنك بالفعل عايش الأحداث الحقيقية
أهم حاجة إنك لا تيأس وإنك تكمل للأخر
أحداث الكتاب أحيانا تبدو متسارعة .. يمكن ده كان إحساسي لأني قرأت 500 صفحة في 3 أيام
الأحداث تنتقل مما يحدث لوطن إلي نقاش عن العلاقة بين أب وإبنه بسلاسلة مريحة
لغة الكتاب وتسلسل القصة مريح وسهل
والخلاصة من الرواية هي أهم حاجة لازم تفتكرها وإنت بتقرأ الرواية أهم حاجة إنك تكمل للأخر